li conte - Lou brande di mestié
 |
La broudarello Es pas rèn la brouda !Me l'a aprés ma maire. Pulèu que de rouda, Iéu prene mis afaire. Ai tout ço que me fau : L'aiguio, li boubino, Mi cisèu, moun dedau, De telo blanco e fino. Poun de crous e festoun, Vesès, iéu me i'assage E dison qu'à moun age N'en sabe dejà proun. |
 |
Lou fustié Pèr fusteja tout ço que me falié :Gardo-raubo, coumode, e tauleto e lou lié, La mastro, lou pestrin, la taulo de nòuguié, Lou veiriau, la saliero Li banc e li cadiero Fin qu'à la fariniero E lou bel estagnié, Tambèn lou veisselié Emé l'escudelié, Iéu me siéu fa fustié. |
 |
Lis iòu de Pasco Cascaras ! cascaras !La galino fai l'iòu E canto tant que pòu. Nous vaqui mai à Pasco, Anan pinta lis iòu. Avans, fau que se cose L'iòu, pèr que siegue ciue. N'en pintaren de blu, Douge emé de rose E de touto coulor. Pièu, tout à noste entour, Coume se fai pèr Pasco, Cascaras ! cascaras ! Faren douno dis iòu A-n-aquèu que n'en vòu. |
 |
Li fielarello Adematin, Fefin e JanoFielon lou lin, fielon la lano. Fielon la lano emai lou lin, Jano e Fefin, adematin. Regardas coumo soun ouroso D'agué chascuno sa fielouso ! Regardas-lèi torse lou fiéu ! _ "Lou miéu es mai fin lou tieu", Dòu tèms que lou fiéu se debano, Dis, en risent Jano à Fefin. _ "Es que lou tiéu es fiéu de lin E que lou miéu es fiéu de lano", Autant lèu ié respond Fefin ? _ "As resoun, o, recounèis Jano, Lou lin es mai fin que la lano E lano mai grosso que lin". |
 |
Lou musicaire Pèr passa lou tèms Vau douna l'aubado A mi cambarado Que seran coutènt. Trovon tant plasènt Lis èr que debano Moun flutet de cano. Acò li rènd gai. Mi cansoun galoio Ié donon de voio Quand soun au travai E l'obro se fai Bèn mies e mai gai. |
 |
Lou pastre De bon matin siéu vengu Tout galoi durbi la cledo Pèr mena paisse mi feno Sus li erme e li tepu. Ma flahuto, se l'ai presso Bèn segur n'en jougarai En pensant à la maridairai. Se vesias coume a bon biais ! Me l'a proumesso soun paire Qu'es countènt de moun travai. La journado duro gaire Quand fasès tant dous pantai. |
 |
Lou pintre Craioun e pincèu Sus la pajo blanco Se pinton lou cèu, La mar, la calanco, Veiras, un batèu Di grand velo blanco Parti autant lèu. Craioun e pincèu Sus la pajo blanco Se pinton pulèu L'aubre e la restanco, Vaqui, autant lèu, Veni un aucèu Canta sus si branco. |
 |
La teisserano Fai quàsi bèn lèu setanto an, Mon grand s'èro fa teisseran Coume ma grand. E tambèn moun paire e ma maire An teissu la lano en cantant. A moun tour m'agrado de faire Lou gai mestié de teisseran. L'insignarai à mis enfant Quand pode, eici touto souleto, Faire d'estofo emé li fiéu Que se debanon di naveto Pèr se crousa 'mé d'àutri fiéu, I'a res de countènt coume iéu !... |
 |
Lou terraié Iéu que siéu terraié Vous fau de terraieto, De toupin e de sieto, Li mole de mi det. Lis oulo, li toupino, Li bolo li mai fino Coumo li tian groussié E bèn d'àutris eisino, Li dourgo e li pechié, Tout acò sabe faire. L'ai après de moun paire. M'a di que terraié Es lou plus bèu mestié. |
 |
La tenchuriero Pèr tegne lou fiéu, Fasès coume iéu, Bouli dins uno oulo De garanço e de fustet, De coucagno e de vermet, De mióugrano e d'espargoulo. Quand lou fiéu a bèn trempa, Fau l'estrènde pèr seca. Uno fes l'aigo esbegudo E li floto bèn eissudo, Voste fiéu prendra coulour Autant bello que li flour. |
 |
Lou marchand d'abit - Fasès-me lèu vèire, marchand, Li bèus abit qu'avès à vèndre. Davans mis iue li fau estèndre. Iéu vole saupre se me van. - Ai touto meno d'abihage, Casaquin e courset brouda, Raubo, faudau, fichu, coursage, Segur vous pode countenta. - Me faudra tambèn de riban, De flot, de broucat, de dentello. Voudrièu èstre la plus bello Que me maride après-deman ! |
Charles Galtier | |