Un martegau, venié tóuti li jour à Marsiho pèr d'afaire qu'avié ; e tóuti li vèspre, quand èro de retour au Martegue, si vesin venien ?
- Bèn ? Genèsi, que i'a de nòu à Marsiho ?"
E lou bon Genèsi racountavo de fiéu en courduro, tout ço qu' èro arriba de nòu dins la capitalo dóu Miejour.

Un jour sus tóuti lis autre, lou bon Genèsi aguènt pas rèn à dire de nou à si finocho de coumpatrioto, e s'esperant pamens, coume toujour, à la questioun ourdinàri :
- oh ! pèr aquesto fes, se diguè 'n éu-meme, fau que n'i en fague peta uno, à-n-aquésti gournau, uno, ma fe de Diéu, que tube !
Acò vai bèn.

Arribo au Martegue vers la tardo, e, dóu plus liuen que lou veson :
- Bèn ? Genèsi, que i'a de nòu à Marsiho ? ié cridon li Martegau.
- Ah ! mi paure ! fai Genèsi, vous n'en vau dire uno, vuei, que pòu coumta pèr dos !... Ah ! mi bon ! ve ! se l'aviéu pas vist, l'ase me quihe se l'auriéu cresegu !"
Et, tout-d'un-tèms, coume se lou troumpetoun avié passa pèr la vilo, tout acò, femo, ome, enfant e vièi, se rambo à soun entour e lou racountaire de nouvello entameno alor lou plan qu'avié tira :

"Saubrés, dis, Martegau, saubrés que, de-matin, en rado de Marsiho, es arriba 'n pèis, mai un pèis tant groussas, tant gaiardas e tant loungas, que la tèsto es amarrado dins lou port e la co vai touca lou Casstèu-d'I ! O, lou creirés o lou creirés pas, aquéu pèis d'espetacle a 'mbarrassa sa tèsto entre lou fort Sant-Jan e lou fort Sant-Micoulau, e, tout Marsiho es mounta pèr amount à Nosto Damo de la Gàrdi pèr vèire coume li pescadou faran pèr lou póutira d'aqui !"

Li Martegau, pecaire, lou beguèron coume de mèu ! e, ni quand vau ni quant costo, anen ! zóu ! parten ! E, sèns sounja qu'anavo èstre niue, femo, ome, fiho, vièi, enfant, tout acò part pèr Marsiho, coume s'anavon en de noço !
Genèsi, éu, lou fin tiraire de grèco, èro sus uno auturo que li regardavo passa, en s'espóutissènt dóu rire... En vesènt pamens que tout lou mounde i'anavo, franc di malaut :
- Oh ! tron-de-noum-d'un-laire ! se diguè tout espanta, tout lou Martegue ié filo : fau que fugue verai !

E tout-d'un-tèms, nousant si courrejoun se bouto à courre tant que póu pèr aganta lis autre, e marcho em' éli vers Marsiho.

Arm. prouv. 1856