Es verai que li voto prouvençalo, dins lou relarg roudanien entre Camargo e Durènço, noun se podon imagina sènso li bióu. Li gènt, aqui, amon talamen tout acò que se parlo d'agué "la fe di bióu", e pièi "d'afecioun" pèr aquesto ativeta... Lis amatour faran la diferènci entre de biais proun diferènt.

- D'en proumié, dins li vilage, i'a li courso que se fan pèr carriero. "L'abrivado", quouro li biòu arrivon, envirouna pèr la gardianaio à chivau, e que li jouine fan tripet pèr faire escampa li bèstio. "La bandido" quouro, justamen, li biòu soun bandi tout soulet pèr que rintrèsson, d'aqueste biais, dins soun càrri o soun bouvau. I'a pièi lou jo de la "bourgino" ounte lou tau es estaca em'no cordo, e que li gènt assajon de l'aganta. Un soulet vilajoun a resta fidèu à-n-aquesto usanço que se vai perdènt. S'agis d'Eirago, en pais d'Arle, entre Sant-Roumié e Castèu-Reinard...

- I'a pièi li courso que se fan dins lis areno, que li mai grando, li mai anciano e li mai bello soun en Arle e à Nimes. Aqui dedins, se fai li courso camarguenco. Lou reglamen d'aqueste jo fuguè pau à cha pau crea au mitan dóu siecle XVen, après que tout acò se fuguèsse fa libramen, dins la cour di mas e sus li planet di vilage. Li gardian estacon au biòu uno coucardo entre si bano, e que li rasetaire assajon de leva. Aqui, segur, la bèstio es de touto l'encountrado. La vedeto, es pas l'ome, mai lou biòu, que soun noum es marca en grand sus lis aficho. Li mai grand de l'istòri - li Prouvènço Vovo, Goya, Rami e n'en passe... - an resta dins li memòri. An soun toumbèu, soun estatuio... Soun adoura coume de Diéu...