Un cop i' avié 'no pichoto que ié disien lou Capeiroun Rouge. Sa maire ié boutè, dins un pichot panié, un pot de burre em' uno fougasseto e ié diguè :
- Mignoto, vai pourta acò à ta grand.
Lou pichot Capeiroun Rouge se meteguè dounc en camin e, pèr camin, rescountrè lou loup, em' acò lou loup ié venguè :
-Pichoto, pichoto ! ounte vas ?
- Vau vers ma grand ié pourta 'n pot de burre em' uno fougasseto.
- E de que camin vas passa ? dòu camin di peireto o d'aquéu dis espingleto ;
- D'aquéu dis espingleto, qu'ansin n'acamparai.
- Mai toun panié t'empachara. Baio-me toun panié, que te lou pourtarai. E, iéu, ve, passarai dòu camin di peireto e nous retrouvaren vers la porto de ta grand.
\r\nE lou capeiroun Rouge ié baiè soun panieret.
E lou loup part à grand courso pèr arriba proumié. Quand fuguè arriba :
- Pan ! pan ! à la porto.
- Quau es acò ? cridè la grand.
- Es iéu, diguè lou loup, es iéu vosto feleno que vous aduse un pot de burre em' uno fougasseto.
- Eh ! bèn, ausso la cadaulo, e pauso-lèi dessus la taulo.
E, m'acò lou loup intrè, se jitè sur la grand e la devouriguè. Pièi, quand aguè proun manja boutè ço que restavo dins l'armàri e lou sang dins un plat souto la taulo.
Après, lou loup carguè la couifo de la vièio e s'anè coucha dins soun lié.
Lou paure Capeiroun Rouge à soun tour vèn pica :
- Pan ! pan ! à la porto.
- Quau es acò ? cridè lou loup.
- Es iéu vosto pichoto, que vous aduse d'espingleto...
- Eh ! bèn, ausso la cadaulo, e li metras dessus la taulo.
Vous adusiéu un pot de burre em' uno fougasseto ; mai ai rescountra lou loup, que m'a demanda moun panié ; ai agu pòu que me mangèsse e i' ai douna.
- E as bèn fa, mignoto !
- Ma grand, ai uno bello som !
- Eh bèn, vène te faire, mignoto, contro iéu.
Quand lou Capeiroun Rouge pièi se fuguè coucha, atrouvè dins lou lié de cambo tòuti pelouso !
- Boudiéu ! ma grand, mai avès bèn de péu i cambo ?
- Acò 's de vieiounge, moun enfant !
- Boudiéu ! ma grand, mai avès bèn un gros parla ?
- Es pèr miés me faire ausi, moun enfant !
- Boudiéu ! ma grand, avès bèn de grèndis auriho ?
- Es pèr miés me t'escouta, moun enfant !
- Boudiéu ! ma grand, avès bèn un gros nas ?
- Es pèr miés te sèntre, moun enfant !
- Boudiéu ! ma grand, avès bèn d'iue lusènt ?
- Es pèr miés te vèire, moun enfant !
- Boudiéu ! ma grand, avès bèn de lòngui dènt ?
- Es pèr miés te manja, moun enfant !
E' m'acò lou loup, hau ! la devouriguè.