I roco Massabièlo.

Bello Rèino dou Cèu, o Vierge immaculado !
Qu'un moumen davalant dis esfèro estelado
As fa lusi ti resplendour
Au gènt païs di Troubadour ;
Tu, qu'as chausi nosti valengo,
E qu'as bresiha nosto lengo,
T'en pregue, ajudo-me dins moun prefa d'amour !

Car t'ame, e voudriei, iéu, Miejournau de la bono,
Entouna 'n cant d'ounour à ma douço Madono :
Tout ço qu'à Lourde as dich, as fa,
E ti lausour e ti benfa,
En pure lengo prouvençalo,
Qu'es nosto lengo majouralo,
Lou cantarai, Mario ; assousto moun prefa !

Anen, ma douço lengo ! antan tu mespresado,
En pleno glori ai uei pèr ti felibre aussado,
Pren toun lahut entrefouli.
S'en murmurant toun parauli,
La Vierge de Diéu t'a cantado,
Es-ti pas juste, benastrado,
Que ié rendes lou cant que t'a fa tressali ?

Apound-ié toun aflat, courouso santo Estello,
E cencho menu couplet di set rai de l'estello.
Ansin alisca, diamantin,
Trelusira dins l'azur sin
De la celèsto pouesio
Gramaçi ta lusour qu'esbriho,
Estello, miraren l'Estello dóu Matin.

Esperit de fe, tu qu'aluminant fas vèire
À nòstis iue nebla coume se devon crèire
Li causo que lou mescresènt
Se n'en tèn quite, en se risènt,
Esclairo moun inteligènço ;
Clafis moun amo de cresènço ;
Di vers paradisen fai raia lou sourgènt !

Adounc, l'anan canta l'esbrihandant miracle
Que lou Cèu à, la terro a douna 'n espetacle
En plen siecle dès-e-nouven :
Pòu que te charron li savènt,
O te chicane l'incredule,
Moun vers, fai-te mai d'escrupule :
Dóu soul flame verai enlusis lis avèn.