Lou rode d'aquesto viloto aupenco douno, à-n-éu soulet, l'esplico raport à sa presènci e à soun istòri. À quàuqui pas de la Durènço, s'atrobo au cantoun ounte tres valèio se jougnon. Dins Ii tèms ancian s'agissié de camin impourtant pèr la routo de la sau e pèr l'amountagnage dis abeié, valènt-à-dire de draio trevado pèr l'ome despièi sèmpre. Aqui, la ciéuta que n'en parlan se capito au bèu mitan di relarg mieterran e Aupen. Es segura men pèr acò que l'endré fuguè chausi tre l'Antiqueta pèr un pople Celto-Ligour que ié metiguè sa capitalo.
En 14 avans J.-C. l'emperaire Aguste faguè de Digno uno coulounìo romano de dre latin. La ciéuta devenguè pièi lou sèti d'un evescat qu'es lou mai ancian dis Aup. Dins l'aut age mejan, la vilo, antico s'encapè mau desfendudo, davans lis envasioun emai Ii incursion, pèr eisèmple aquelo di Sarrasin que venien de-countùnio piharda entre la costo e lis Aup. Es alor que l'evesque faguè basti un castèu sus lou roucas vesin, que devenguè lou cor de la ciéuta medievalo.
Se gardè proun d'impourtanço fin qu'au siecle 16en, la vilo passè pièi uno marrido pountannado. Es que fuguè souvènt matrassado pèr d'epidemìo, li guerro de religioun apichounissènt pièi sa poupulacioun. À la fin de l'ancian regime, Digno èro plus gaire qu'uno viloto endourmido, au bèu mitan de la Gavoutino, ounte la Basso Prouvènço trouvavo soulamen de gènt pèr travaia. Chasco annado, li Gavot davalavon de si pàuri moutagno pèr derraba sa vidasso en anant, pèr eisèmple, meissouna en Païs d'Arle.
Es la Revoulucioun que redounè à Digno uno voio nouvello. Dins un relarg rurau e pas gaire urbanisa raport à la Prouvènço roudanenco e maritimo, la pichoto vilo fuguè chausido pèr deveni lou cap-liò d'un nouvèu despartamen, que ié metiguèron pèr noum aquéu de Bàssis Aup - devengu aro lis Aup de-n-Auto Prouvènço. Soun evescat fuguè restabli. Digno s'es ansin trasfourma en un cèntre amenistratiéu, coumerciau em'agricau atravali, pèr eisèmple especialisa dins la lavando. Aquelo ativeta es festejado chasco annado, dins l'estiéu, pèr de gràndi fèsto.
