divers - Marsihoretour

reviraduro
marseille
Aquelo d'aqui es visto coume la mai vièio ciéuta de Franço. Mai es tambèn la grando vilo qu'es la mai pauro en mounumen. Foundado pèr Ii Gre aperaqui devers 600 avans J.-C., l'antico Massalia es de-bon à despart, se capitant mai mieterrano que prouvençalo o franceso. S'agis avans tout d'un rode mounte se passo. Un endré pèr pausa Ii merço e Ii proudu avans de Ii manda aiours. Es ansin que Ii mounumen simbouli, aqui, an pas ges d'impourtanço, d'autant que lou terraire marsihés es esquicha entre la mar e lis auturo que lou desseparon de Prouvènço.
Ço que counto soulamen, à Marsiho, es lou negòci, que se ié sacrifico tout. La ciéuta viro sèmpre lis esquino dóu coustat de la terro pèr soulamen regarda devers la mar e faire de coumèrci. Es acò qu'esplico en grando part l'aneissioun de Prouvènço à la Franço, que lou role de Marsiho, aqui dedins, fuguè di grand. Adounc, i'a uno grosso diferènci entre la catalanisto Barcilouno e l'apatrido e mercantilo Marsiho...
marseille
Tre l'Antiqueta, li Massalioto se ligon d'un biais coumerciau emé li terra dóu dedins emai li costa dóu Pounènt mieterran. S'Arle pousquè leva de cassolo Marsiho au tèms di Rouman, la reneissènço ecounoumico de l'age mejan ié redouno soun enavans. Di Crousado jusqu'à la coulounisacioun, tout acò 's segur liga au Levant. La Franço aguènt pas, ges de port sus sa costa d'óurigino, la grosso bourgesié marsiheso fai tout pèr favourisa l'aneissioun de Prouvènço au grand vesin, dins l'escasènço de faire trachi soun négòci.
marseille
À la fin dóu siecle 15en, tout acò 's fa pèr l'un di siéu, Palamedo de Fourbin. Marsiho sara lèu-lèu recoumpensado en aguènt lou mounoupòli coumerciau 'mé lou Levant. Mais la vilo restara sèmpre rebroussiero raport à soun nouvèu païs. Après agué castiga soun biais renaire e tout en la tenènt d'àment, Louvis XIV baio à Marsiho l'estatut de port franc en 1669. Au siecle d'après, soun coumèrci s'alargo au mounde entié. Si negouciant bastisson sus plaça d'industrìo pèr travaia li proudu que i'arrivon d'en pertout - òli, sabounarié, mangiho.
marseille
Lou siecle 19en veira Marsiho à soun pountificat dóumaci la coulounisacioun que coumènço tre 1830 emé la counquisto d'Argié, seguido pèr lou cavamen dóu Canau de Suez sènso óublida lou camin de fèrri. La vila es escais-noumado « La Porte de l'Orient ».
Lou Lacidoun devenènt trop pichot, lou port s'espandis en aut de la ciéuta. Trè lou tèms de Louvis XIV, lou vièi Marsiho s'èro proun agrandi, causo que se perseguira pièi de-longo. Li rode basti dins lou cèntre soun mai que mai bourroula pèr leissa plaça en de nouvèu bastimen. La Canebiero devèn uno mena de frountiero entre dos partido despariero de la vilo. L'aut es poupulàri, óubrié emai industriau. Lou miejour bourgés e residenciau. Mai la descoulounisacioun marco la fin de l'age d'or.
marseille
Avèn deja afourti que Marsiho fuguè sèmpre cousmoupoulito. Acò pamens, se faguè sèmpre emé la presènci, aqui, d'uno drudo culturo poupulàri sabènt assimila li causo vengudo dóu deforo, avans de lis espandi dins touto la Prouvènço. Jusqu'à la fin dóu siecle 19en, lou prouvençau marsihés qu'illustrè Vitour Gelu èro parla d'en pertout. À l'epoco de Louvis XIV, la marqueso de Sevigné o Madamisello de Scudéry fuguèron estabousido de pas pousqué parla franchimand emé li femo dóu pessu. La vido de la ciéuta èro clafido de fèsto. Marsiho èro la capitalo vertadiero dóu tambourin prouvençau, qu'es aqui que restavon li mai grand musician d'aquel estrumen.
marseille
Vuei, Marsiho viéu sèmpre que mai emé si forço e si feblesso. Crusàu di civilisacioun, lou chaumage e li garrouio racialo ié soun de-Iongo un gros proublèmo. La vilo es regretouso dóu tèms astra que religavo la Franço àsi coulounìo. Mai pivelado pèr l'eisèmple de si vesino - Barcilouno, subre tout... - pantaio de deveni uno capitalo culturalo. Adoubon de nòu lou front de mar, dins lou relarg de la catedralo. Dins la vilo, i'a mai que mai de rode « cabla », autant bèu qu'aquéli que s'atrobon dins lis àutri gràndi metroupòli. Quau que fugue l'aveni, aquéu d'aqui, pèr Prouvènço, se fara pas sènso Marsiho...
Remi Venture