...

Fai quatre milioun d'annado, ero ternàri, dins aquéu rode que vendra pièi Camargo, la mar ié fasié brama sis erso e s'espandissié enjusqu'à Lioun.

Fai 500 milo annado lou nivèu de la mar s'abaisso forço, lou delta coumènço de se fourma qu'anara en s'espandissènt vers lou sud.

Fai 3 milioun d'annado, Durènço es un flume que carrejo caiau e cremen vers lou grau ounte nego sis aigo.Lou gou se coumoulo de sablas, de coudelet arredouni en aguènt forço barrula e que la mar coutunio de li lissa.

Fai 1 milioun 600 milo annado, lou Rose s'abrivo vers la mar en se traçant un camin à quaucarèn proche d'aquéu que ié couneissèn aro. En aquelo epoco que la mar fai arrié, li ribiero e mai que tóuti lou Rose carrejo à bòudre si caiau que s'empielon sus de deseno de metre d'aussado. Aqui subre se vènon depausa li sedimen marin.

Fai un milioun d'annado la presènci de l'ome es atestado dins Camargo.Vivié de casso e de culido.

Fai 10.000 an la mar remounto, en rebutant vers lou nord lou front dóu delta. Lou Rose engoulis la Durènço qu'es estado remandado vers lou nord de l'estang dóu Vacarés. Lou flume vaguejo de siècle e de siècle de tèms carrejant sènso relàmbi si cremen. Li courrènt fan s'amoulouna de levadoun naturau fa de sablo, isoulant de palun, e que li marco se n'en devinon encaro à l'ouro d'aro, parié coume se devinon tambèn li marco que li costo de la mar, chanjadisso, leissèron à de rèng. Sus la costo arenouso de mountiho se formon que li courrènt fan e desfan de longo.fourmant de gou d'estang.

Fai 5000 an, la Camargo se formo, païs d'aigo e de sablo, païs de longo chanjadis que decessara jamai de se faire e desfaire.

A l'ouro de vuei la costo es parieramen mouvedisso e chanjadisso ; quasimen de memòri d'ome se n'en pòu segui lis evoulucioun e se la ramenta talo qu'èro fai soulamen quàuquis deseno d'an. Lou faro de Faraman, basti en dedins di terro en 1840 s'aclapè en 1917, un autre faro fuguè auboura Lou fare de la Gacholo s'atrovo liuen en dedins di terro.Pèr lou vèire sufis d'endraia la digo à la mar. Entre l'estang de la Vignolo e l'estang de Galabert. Acò se fai d'à pèd, leissant li veituro à l'estacioun de poumpage o un pau plus liuen proche lou pertuis de la Coumtesso : lou faro de la Gacholo.

Li bòudro dóu flume e li sedimen adu pèr la mar soun entrina vers lou tremount, acò fai que la pouncho de Baudu avanço vers la vilo di Santo. Mai aquelo vilo di Santo que s'atrouvavo antan dins li terro vei si plajo ana en demenissènt. Forço fourçado fauguè bèn basti soulide de levado de roucas fin d'apara la cièuta. Lou port pèr li batèu de plasènço, en mai de soun impourtànci pèr lou tourisme. Es tambèn un mejan d'apara lou païs, en restancant lis erso marino.

La Camargo fuguè long-tèms is iue dóu mounde un rode sóuvertous, uno naturo vierjo, un pau à despart dóu mounde, counsiderado pèr mau-sano pèr encauso di febre que li palun e la mangeanço engendravon.

La Camargo tèn sarrado entre si limito naturalo: Lou grand Rose au levant e, vers lou tremount, si raro seguisson lou cours dóu Pichot Rose, pièi, s'esvarton dóu flume pèr vesina lou canau de Pecaïs e lou Rose Viéu enjusqu'au grau proche li Santo mounte rejoun la mar. De l'autro man dóu Rose viéu s'estend uno terro parieramen palunouso que ié dison « la Pichoto Camargo » cuberto d'uno superbo pinedo de pin pignoun. Vers lou levant lou Grand Rose bourdejo la plano camarguenco, enjusqu'à la mar.

En ribo drecho, lou plan dóu Bourg s'estend dóu flume enjusqu'au Vacarés, emé li salin au sud. En ribo gaucho, lou Pichot Plan dóu Bourg e lou Grand Plan dóu Bourg que lou canau d'Arle à Bou.li travesso. Aqui di dos man dóu Rose li païsage se sèmblon, souveni belèu de l'age mejan que lou cours dóu flume dempièi Mas Thibert, se clinavo un pau vers lou levant. Entre la mar e li dous Rose, la Camargo es facho d'estang, que lou mai estendu es lou Vacarés, e de palun. Dins lis estang atrouvan d'iscloun mai o mens grand, iscloun à ras dis aigo que ié dison li radèu, estènt que soun plat e sèmblo que nadon sus lis aigo. Lou païsage aqui nimai es pas fissa e li radèu soun de cop que i'a chanjadis e perèu li passage que permeton d'ana d'un radèu dins l'autre. Aquéli passage, li gaso, li biòu li counèisson, tambèn li rosso ; li gardian li sabon, empacho pas que de s'engasa es pamens dangeirous. Demié aquéli radèu lou mai impourtant es lou Riege. Es cubert encaro vuei d'uno vegetacioun aboundouso, d'uno sèuvo impourtanto souveni de la sèuvo antico. Lou Riege s'atrobo dins la reservo de Camargo ; es enebi i visitour e degun noun lou pòu treva. Vai ansin qu'a serva lou plantun proumieren... e l'animalun ié trovo la pas e la tranquileta.

Lis estang soun esta fourma pèr la mar, sis aigo soun pau o proun salancouso. La sansouiro recuerb lou sòu que, d'estiéu, s'enflouris di milànti floureto estellado de la saladello. Lis engano, di coulour chanjadisso, à l'aflat di sesoun verdo o rougejanto, à perdo de visto soun lou doumaine di blanc chivau.

En ribo de mar de tousco de tamarisso vènon au pèd di mountiho. Vers lou nord de la Camargo dins li palun creisson li rouseliero. Lou trop d'aigo se vai deversa dins li roubino, meno de canau crea pèr lis ome.fin d'agouta li terro. Quouro li palun soun dubert, que coumunicon ensèn, se secon au moumen de la calabreno leissant uno terro rabinado. L'ome a dounc crea tout un maiun de canau siegue pèr leva lou trop d'aigo, es li roubino, siegue fin d'adurre d'aigo dóu Rose pèr leva lou trop de sau que remounto e ansin assegura l'aseigage di culturo.

Acò fai que la Camargo noun es plus lou rode d'ourigino, sóuvertouso coiume fuguè. Es un rode que l'ome a farga.,mai pamens en ié leissant, saupre pèr quant de tèms encaro, soun carage, un endré que soun animalun ouriginau pòu encaro ié vièure e que counvèn d'apara se ié voulèn counserva aquelo naturo que se pòu encaro dire vierge.

Aquelo sau, proudu necite à la vido, aquelo sau que tant nous fai besoun, de mounte vèn ? Que que siegue lou rode mounte aro se pòu trouva, la sau vèn toujour de la mar. Pamens segound lou rode, segound tambèn li mejan e lou biais que n'en fan l'esplecho, se pòu destria :

La sau gemo, meno de sau dirias foussilisado que l'apelan de cop « Memòri de la mar » acò dis bèn soun ourigino, vestige di mar proumierenco, s'atrovo dins la terro en de proufoundour quàuqui fes impourtanto. Pèr la pousqué utilisa, de teinico diferènto soun emplegado.

La sau de terro : es de la sau gemo que, pèr l'utilisa, es necite de cava de pous de mino e de galarié fin de remounta au jour la sau seco e soulido. Aquéu biais de faire es atesta deja dins l'antiqueta e fuguè pratica dins lou siècle XIIIen courrentamen.
Pamens es subretout vers la fin dòu siècle XIXen en que se desveloupè emé l'ameiouranço di teinico minièro.

La sau inigeno : lou biais es de manda d'aigo dins un pous de fourage fin d'agué uno saumuro qu'es remountado au jour. Lou clourure de sodium delega dins la saumuro es soumés pèr la calour à uno evapouracioun fourçado e se cristaliso. Aquéu biais de faire èro couneigu deja dins li tèms neouliti, emé de gerlo de terro cuecho pleno d'aigo salado que se metien dins de meno de fougau pèr fin que l'aigo s'evapourèsse e que la sau se cristalisèsse. Se praticavo tambèn à l'age mejan. mai demandavo de coumbustible en abounde e aquéu biais de faire represènto belèu adeja uno ativeta industrialo.

La sau soulàri, es aquelo que lou mai nous interesso La sau marino se recordo après esvapouracioun de l'aigo de mar pèr la souleto acioun de l'energìo soulàri.

...