Es forço bèn que Mistral resumiguè lou destin d'aquelo vilo dins un discours famous que n'en marquèron un escapoulon à l'intrado de la Coumuno :
« 0 tu que siés estado tout ço que se pòu èstre. La metroupòli d'un empèri, la capitalo d'un reiaume e la matrouno de la Liberta... ». :

Lou site proumieren d'Arle es uno auturo mounte vèn buta lou Rose, au bèu mitan di palun. Semblarié qu'aquest endré fuguèsse esta treva pèr l'ome tre lou siecle 6en avans lou Criste. Li Gre de Marsiho ié foundèron un establimen pèr faire de negòci que devènguè vite impourtant. Mai li dous rode se faguèron pièi garrouio. Arle anè dóu coustat de Cesar dóu tèms que Marsiho chausiguè lou camp de soun rivau Poumpèi. Aguènt baia de batèu dins l'escasènço de counquista Marsiho, Arle gagnè li joio en devenènt Coulounìo Roumano en 46 avans J-C. Adournado pèr de bèu mounumen, la ciéuta reçaupè un territòri forço grand. À la fin de l'Antiqueta, la ciéuta es à soun pountificat quouro devèn residènci imperialo e prefeituro di Gaulo.

Aguènt pas rousiga soun poudé coume tant lou cresiguèron, l'aut age mejan douno enca mai d'enavans à la vilo que counservo soun estatut de capitalo. Sis evesque beilejon tóuti aquéli de la Gaulo miejournalo. Cèntre d'un reiaume miti, es à l'entour d'Arle que la Prouvènço medievalo se coungreio. Tre 1131, la ciéuta devèn un counsulat, idealisa dins la « Republico d'Arle » legendàri. Mai l'ouro d'uno marrido pountannado arrivo pièi.

S'atrouvant sus raro de Prouvènço e s'encapant proun couneigudo coume rebroussiero, Ii Comte de Prouvènço quiton Arle. Amon miés d'ana viéure dins la ciéuta de-z-Ais, mai doucilo, e en plen au mitan de soun principat. La vengudo di Papo en Avignoun ensuquè mai la vilo en levant uno grosso part dóu prefa espiritau de soun evesque. Li routa dóu coumèrci, desenant, passèron plus pèr Arle mai en aut, au nivèu de la nouvello ciéuta papalino. Perdudo dins un grand territòri desert entre Crau, Camargo em'Aupiho, Arle fuguè plus qu'uno viloto emé soulamen de paisan, de marin, en coumpagno d'uno noublesso e d'uno pichoto bourgesié terradounenco.

Dóu siecle 16en au 18en, pamens, la vilo s'adorno encaro de galant mounumen. Mai la Revoulucioun acabo soun declin emé la supressioun de soun antique archevescat.
Arle penequejo pièi durènt tout lou siecle d'après. La souleto causa qu'alor ié rèsto, es soun port. Mai es arrouina pèr lou camin de fèrri, après lis annado 1860. Emé soun ufanous passat ramplaça pèr un presènt mediocre, Arle gardo qu'un bon coustat. Devèn lou simbole lou mai vertadié de la Prouvènço e de sa destinado. Li marrit coustat tirant dóu passat èron quasimen devengu de bàni causo, que tout acà avié counserva, en Arle, un bèu patrimòni emai d'estacanto tradicioun - mounument, coustume, li biòu... E lèu-lèu, lou paire de Mirèio chausiguè Arle pèr n'en faire sa capitalo e lou counservatòri de l'amo e di tradicioun nostro, ço qu'esplico nosto citacioun mistralenco. Mai talo escasènço se faguè que plan-plan. La vilo pousquè de-bon aprouficha de sa nouvello voucacioun que vers la fin dóu siecle 20en....

Segur, li nivo negre amoulouna sus l'anciano ciéuta dóu Lioun an pancaro tóuti passa. Deja pas gaire industrialisado, la vilo agantè en plen la criso ecounoumico, d'autant qu'aguènt un territòri grandaras - es la mai granda Coumuno de Franço - dèu paga un mouloun de causa sènso agué forço sòu. I'a pas gaire, Arle fuguè encaro marca pèr de gròssis inoundacioun, que faguèron tira de plan i poudé publi raport i cop de Rose. Mai la qualita de vido qu'avèn aqui es sèmpre tant agradivo. La bello sesoun arlatenco es drudo d'uno mouloun de causo interessanto, di tradiciounàli Fèsto d'Arle i Rescontre de la Foutougrafio en passant pèr lou nouvèu festenau Me dison Prouvènço, que se vàu coume la mostro d'uno prouvènço identitàri duberto sus lou mounde,

Dóumaci soun estatut de vilo culturalo, e meme universitàri, Arle gardo sis atou dins la man. Aquéli d'aqui fan d'elo uno di bélli ciéuta dóu Miejour. Talo plaço es d'autant mai remarquable que l'antico Arelate se capito forço mai pichoto que si vesino... Es dire que lou Passat prouvençau es devengu pèr Arle uno bono marco pèr l'Aveni, aqui, es mai que mai vivènt...